Friday, February 27, 2015

Metkut (मेतकुट)

मेतकुट हे आपल्या स्वयंपाकघर सहज उपलब्ध असणाऱ्या पदार्थांपासून बनवता येते. मऊ भात किंव्हा खिमट/गुरगुऱ्या भात त्यावर साजूक तुप आणि मेतकुट खूप छान लागते. पूर्वीच्या काळी न्याहारीला हमखास असे खाल्ले जायचे. आजारी असताना किंव्हा परिक्षेच्या दिवसात हलका आहार म्हणून अतिशय चांगले. बाळाला भाताची पेज किंव्हा खिमट भरवताना त्यावर मेतकुट घालावे. "मेतकुट" करायलाही फार सोपे आहे. कसे ते पहा ....



Read this recipe in English...... click here.

साहित्य:
  • चणा डाळ- १ कप
  • उडीद डाळ- १/४  कप
  • तांदुळ- १/२  कप
  • गहू - १ टिस्पून
  • लाल तिखट/मिरची पूड  - २ टीस्पून
  • धणे- १ टिस्पून
  • जिरे - १ टिस्पून
  • हिंग - १ टिस्पून
  • हळद - १ टिस्पून
  • मोहोरी - १ टिस्पून
  • दालचिनी-  १ इंचाचा तुकडा 
  • काळे मिरी- २
  • लवंग- ४
  • जायफळ - अर्धे 

कृती:
  • मंद आचेवर  मिरची पूड, हिंग, जायफळ, हळद वगळता सर्व साहित्य वेगवेगळे खमंग न करपवता भाजा. 
  • ते सर्व साहित्य एकत्र करा व थंड होऊ द्या. त्यावर जायफळ किसून घाला. 
  • नंतर उर्वरित साहित्य पण त्यात घालून सर्व साहित्य मिक्सर मध्ये दळून  बारीक पूड  करा. 
  • बारीक चाळणीने चाळुन  आणि हवाबंद डब्यात भरून ठेवा. आपण २-३ महिने हे वापरू शकता.

मेतकुट कसे खाल ……?
  • गरम भात किंव्हा मऊ भात , मेतकुट, साजूक तूप चांगले मिक्स करावे आणि गरम गरम खा. हव असल्यास भातावर लिंबाचा रस किंवा दही घाला.
  • मेतकुट, दही, मीठ, बारीक चिरलेली कोथिंबीर आणि चिरलेला कांदा घालावा.  कोशिंबीर तयार. हव तर वरून फोडणी पण देऊ शकता.
  • ब्रेड बटर लावून भजा त्यावर जरास मीठ आणि मेतकुट लावा. 
  • मेतकुट पोहे बनवा.  

Wednesday, February 25, 2015

Sodyachi Khichadi (सोड्याची खिचडी /सोडे भात)

सोड्याची खिचडी किंव्हा सोडे भात कोकणात अतिशय लोकप्रिय आहे. सी. के. पी. लोकांची तर यात खासियत आहे. 



Read this recipe in English.... click here. 

वाढणी: ४
साहित्य:
  • सोडे - १/२  कप
  • तेल-  ४ ते ६  टेबलस्पून 
  • तांदूळ - २ कप (बासमती तांदूळ वापरण्याची गरज नाही, मी कोलम तांदूळ वापरते. )
  • कांदा, उभा चिरून- २ कप 
  • टोमॅटो, बारीक चिरून- १ कप
  • बटाटा- १ मोठा 
  • दालचिनी- १ इंचाचा तुकडा
  • तमालपत्र- ३
  • आले-लसूण पेस्ट - १ टेबलस्पून
  • हळद - १/२ टिस्पून
  • हिंग- १/२ टिस्पून
  • घरगुती मसाला किंवा मालवणी मसाला- ४ ते ५ टिस्पून 
  • ओल्या नारळाचे वाटण- २ टेबल स्पून (नाही वापरले तरी चालेल)
  • मीठ- चवीनुसार 
  • पाणी - ४ कप (तांदूळ जुना आहे की नवा यावर अवलंबून असते)
  • अंडी, उकडलेली - २
  • कोथिंबीर, बारीक चिरून - मुठभर 

कृती:
  • सोड्याचे हातानेच तोडून लहान तुकडे करा.  
  • व्यवस्थित धुवून आणि १५ मिनीटे पाण्यात भिजवा आणि नंतर घट्ट पिळून घ्या.
  • तांदूळ धुवून बाजूला निथळत ठेवा. 
  • बटाटा सोलुन त्याचे  साधारण १ इंच लांबीचे तुकडे करा.
  • एका छोट्या कुकर मध्ये तेल गरम करावे. त्यात तमालपत्र, दालचिनी आणि कांदा घालावा.
  • कांदा गुलाबी रंगावर परतला गेला की त्यात हळद, हिंग, मसाला टाकून जरास परता. त्यात आले-लसूण पेस्ट घालून पुन्हा परता आणि भिजवून पिळुन घेतलेले सोडे घालून १ मिनिट परता.
  • नंतर त्यात वाटण घालून तेल सुटेपर्यंत परता. 
  • आता टोमॅटो, बटाटा घाला आणि २ मिनिटे चांगले परता.
  • नंतर तांदूळ घालून एक मिनिटभर परता.
  • पाणी आणि मीठ घाला. (नुसतेच पाणी वापरण्याऐवजी अर्धे पाणी आणि अर्धे नारळाचे दुध वापरले तर अजून मस्त चव येते.) चांगले मिक्स करावे आणि झाकण लावून कुकर बंद करा. ३ ते ४ शिट्ट्या घ्या. (कुकरच्या बाहेरही करता येईल, गरम पाणी वापरलेत तर भात चांगला मोकळा व लवकर शिजेल. साधारण भात शिजायला १५ ते ते २० मिनिटे लागतील.) 
  • वाढताना वरून चिरलेली कोथिंबीर भुरभुरा. कोशिंबीर आणि उकडलेल्या अंड्यासोबत गरमागरम सर्व्ह करा. सोबत सोलकढी उत्तम लागते.  

टीप:
सोडे म्हणजे उन्हात सुकवलेली कोलंबी. कोकणात अनेक पदार्थात सोडे वापरले जातात. अधिक माहितीसाठी "सुकी मासळी" इथे क्लिक करा. 

Wednesday, February 11, 2015

Khekadyache Kalwan (खेकडा/चिंबोरीचे कालवण)

ज्या कालवणाच्या वासाने भूक चाळवते, रंगाने डोळे आसुसतात आणि चवीने जिव्हा तृप्त होते असे हे खेकडा किंवा चिंबोरीचे कालवण!


Read this recipe in English.......click here.


साहित्य:
  • खेकडे/चिंबोर्‍या/कुर्ल्या -  ६ 
  • कांदा, बारीक चिरुन- १ मध्यम 
  • हिंग- १/४ टीस्पून 
  • हळद- १/२ टीस्पून 
  • घरगुती मसाला किंव्हा मालवणी मसाला- २ ते ३ टीस्पून 
  • तेल- ३ ते ४ टेबलस्पून 
  • मीठ- चवीप्रमाणे
हिरवे वाटण
  • आले- १/२ इंच 
  • लसूण पाकळ्या- ६ 
  • कोथिंबीर- मुठभर 
  • हिरव्या मिरच्या- १
कांदा-खोबऱ्याचे वाटण 
  • कांदा, उभा चिरुन- १ मध्यम 
  • किसलेले सुके खोबरे- १ खोबऱ्याची वाटी/कवड  
  • काळे मिरे- ४
  • लवंगा- २
  • दालचिनी- २ इंचाचा तुकडा 
  • बडिशोप- १ टीस्पून 
  • धणे- २ टीस्पून 

कृती:
  • चिबोर्‍यांच्या मोठ्या नांग्या आणि बारीक पाय काळ्जीपूर्वक काढून घ्याव्या. चिंबोर्‍या साफ करून स्वच्छ धुवाव्या. 
  • हिरवे वाटण करून मोठे नांगे आणि चिबोरीला चोळावे. हिंग, हळ्द, मीठ व मसाला ही चोळावा. 
  • बारीक पाय मिक्सर मधून काढून त्याचा रस बारीक चाळणीने गाळून घ्यावा. या रसामुळे कालवणाला चव येते. (पण हे जर फारच अवघड वाटत असेल तर नाही केल तरी चालेल. ) 
  • उभा चिरलेला कांदा तव्यावर थोड्या तेलावर तपकिरी रंगावर तळून घ्यावा. चांगला परतला की बाजूला काढून सुके खोबरे भाजून घ्यावे. ते तांबुस झाले की धणे, बडिशोप, लवंग, दालचिनी, मिरे परतून घ्यावे. सर्व एकत्र वाटून बाजुला ठेवावे.
  • आता मोठ्या पातेल्यात तेल गरम करून त्यात कांदा टाकावा. 
  • कांदा परतावा व तपकिरी झाला की खोबऱ्याचे वाटण घालावे व मसाला लावलेल्या चिंबोर्‍या घालून चांगले परतावे. 
  • बाजूला ठेवलेला पायाचा रस घालावा. थोडे पाणी घालून चिंबोर्‍या शि़जवाव्या. शि़जल्या की लाल होतात.  
  • ज्या प्रमाणात रस्सा हवा असेल त्या प्रमाणात पाणी घालावे. साधारण १५ मिनिटे मंद आचेवर चांगली उकळावे.  
  • आणि ……… आणि काय गरम गरम भातासोबत कालवण ओरपावे.  

Tuesday, February 10, 2015

Kokani Val, Vange, Batata, Shenga Mishrbhaji (वाल, वांगी, बटाटा, शेंगा यांची मिश्र रस्सा भाजी)

हिवाळा म्हणजे भाज्यांची रेलचेल. फेब्रुवारीत शेवग्याच्या शेंगा येऊ लागतात. वालाचे दाणे, वांगी, बटाटा आणि शेंगा अशी हि मिक्स रस्सा भाजी एकदम मस्त लागते.



Read this recipe in English...... click here.


साहित्य:
  • ताजे वालाचे किंवा पावट्याचे दाणे- साधारण २ कप (५०० ग्रॅम शेंगांपासून) 
  • वांगे - १ मध्यम आकाराचे किंव्हा ३ छोटी वांगी 
  • बटाटा- १ मध्यम 
  • शेवग्याच्या/शेकटाच्या शेंगा - ४ ते ५ 
  • कांदा, बारीक चिरून- १ मध्यम 
  • लसूण, ठेचुन- ५ ते ६ पाकळ्या 
  • घरगुती मसाला किंवा कोल्हापुरी मसाला किंव्हा लाल मिरची पावडर- ३ ते ४ टीस्पून 
  • मोहरी- १ टिस्पून 
  • हळद - १/२ टिस्पून 
  • हिंग- १/४ टिस्पून 
  • जिरे- १ टिस्पून 
  • गोडा मसाला- २ टिस्पून 
  • गूळ- १/२ टिस्पून (ऐच्छिक ) 
  • मीठ- चवीनुसार 
  • तेल- २ ते ३ टेबलस्पून 
  • कोथिंबीर, बारीक चिरून- २ टेबलस्पून 
  • भाजलेल्या खोबऱ्याचे वाटण- ३ ते ४ टेबलस्पून 
  • पाणी- आवश्यकतेनुसार 
कृती:
  • शेवग्याच्या शेंगाचे ३-४ इंचाचे तुकडे करून सोला. बटाटे सोला आणि १ इंचाचे तुकडे करा. वांग्याचे साधारण१.५ इंचाचे तुकडे करा. सर्व भाज्या धुवून घ्या. 
  • मोठ्या पॅनमध्ये किंवा पातेल्यात तेल तापत ठेवावे. राई, लसूण, जिरे टाकून फोडणी करावी. त्यात कांदा टाकून सोनेरी रंग येईपर्यंत परतावा. 
  • नंतर हिंग, हळद आणि मसाला टाकून परतावे. त्यात खोबऱ्याचे वाटण घालून तेल सुटेपर्यंत परतावे. 
  • वालाचे दाणे आणि थोडे पाणी घालावे. झाकण ठेवून ५-६ मिनीटे शिजवावे. 
  • नंतर त्यात शेंगा, वांगी, बटाटे, मीठ व गोडा मसाला टाकावा. आवश्यक असल्यास थोडे पाणी घालावे व छान मिक्स करावे. 
  • भाजी शिजली कि त्यात गुळ घालावा. (आवडत असल्यास कच्चे/हिरवे टोमॅटो किंव्हा लाल टोमॅटो घालू शकता. कच्च्या टोमॅटोला लाल टोमॅटो पेक्षा शिजायला वेळ लागतो.) 
  • चांगले मिक्स करावे आणि ३-४ मिनिटे शिजवावे. 
  • सर्व भाज्या निट शिजल्यावर गॅस बंद करून भाजीत कोथिंबीर घालावी. 
  • हि भाजी कुकरला पण शिजू शकता. 
  • पोळी किंवा भाकरीबरोबर गरमगरम सर्व्ह करावी. 



Friday, February 6, 2015

Crispy Chicken Tikka (ओवन बेक चिकन टिक्का)

चिकन लॉलीपॉप प्रमाणे चटकदार पण तळलेले नाहीत तर ओवन मध्ये बेक केलेले असे हे … चिकन टिक्का. 



Read this recipe in English......click here. साहित्य:
बोनलेस चिकन- ५०० ग्रॅम
लॉलीपॉप मसाला- 3 टेबलस्पून (सुपर मार्केट किंव्हा क्रॉफर्ड मार्केट मध्ये उपलब्ध) 

चिकनला लावण्यासाठी :
तेल- २ टीस्पून
मिरची पूड- १ टिस्पून 
काळी मिरी पूड- १/२  टिस्पून
आले-लसूण पेस्ट- १ टेबलस्पून
मीठ- चवीनुसार 

कृती:

  • चिकनचे तुकडे करून स्वच्छ धुवा.
  • चिकनला लावण्यासाठीचे सर्व साहित्य एकत्र करून  चिकनला चोळावे. 
  • चिकन एका डब्यात भरून १० ते २४ तास फ्रीजर मध्ये ठेवा. जेव्हा टिक्का करायचा असेल तेव्हा अर्धा तास आधी फ्रीजबाहेर काढा.
  • २०० डी. से. ला ( OTG नसेल तर कन्व्हेक्शन मोड वर किंव्हा ग्रिल मोड वर) ओवन १० मि. प्रीहीट करा.    
  • चिकनला सुटलेले काढून टाका. लॉलीपॉप मसाला लावुन चांगला चोळा.  
  • बेकिंग ट्रे किंव्हा ग्रिल रॅकवर  ते तुकडे मांडा व  २५ ते ३० मिनिटे बेक करा. पण १५ मि. चिकनच्या तुकड्यांची खालची बाजू वर करा म्हणजे दोन्ही बाजूंनी छान भाजले जातील.  
  • कोणत्याही सलाड आणि सॉस बरोबर गरमागरम सर्व्ह करा.
  • मी इथे मेयो सलाड बरोबर सर्व्ह केले आहे.  


टीप:
मी येथे लॉलीपॉप  मसाला वापरला आहे पण आपण टिक्का मसाला किंवा तंदूर मसाला किंव्हा मिरची पूड+ गरम मसाला वापरू शकता. पण मग त्यात  १-२ टेबलस्पून कॉर्न स्टार्च घालणे आवश्यक आहे.